Manipur : CM-in bomb puak avanga naupang thite ruang la turin an chhungte ngen

Manipur chief minister Yumnam Khemchand Singh chuan April 25 khan Bisnupur district-a Tronglaobi khuaa bomb puaka thi naupang pahnihte ruang, kar hnih aia rei mitthi dahna hmuna awm tawh chu la turin an chhungte a ngen. Mipa naupang kum nga leh a farnu nausen hmeichhia thla rukte ruang chu an chhungten pawikhawihtu man chhuah an nih hma chuan lak an tum lo tih an lo sawi tawh a ni.

Coordinating Committee on Manipur Integrity (COCOMI) nen meeting an neih zawha press conference neihah, Chief Minister chuan sorkarin security agency-te nen thawh hona ṭha tak neiin he pawikhawihnaa inhnamhnawihte zawng chhuak tur hian nasa takin hma an la mek tih a sawi. Naupang thi chhungte leh Joint Action Committee-te nen inbiakna an neih tawh tih a sawi bawk. Singh chuan naupang ruang mitthi dahna hmuna an la awm reng chu a rilru natthlak tih a sawi bawk.

Chief Minister chuan state-a remna leh muanna awm theihna turin inbiakna leh thawh hona neih a pawimawh tih sawiin, hunrei tak shutdown puan chuan eizawnna, zirna leh vantlang nun a tibuai tih a tarlang. Naupang pahnih thah an nih bakah, Ukhrul district-a civil mi pahnih thah an ni chu na taka a dem thu sawiin, mipui zingah hlauhthawnna nasa tak a thlen tih a sawi bawk.