Nagaland : IIT dinna tur ngaihtuah mek

Lok Sabha parliament member S Supongmeren Jamir chuan, sorkar laipuiin Nagaland-a Indian Institute of Technology (ITT) din tura hunrei tak chhung ngenna awm tawh chu a ngaihtuah mek tih a sawi. Hmarchhak bial State Education and Development minister Dr Sukanta Majumdar hnen aṭanga chhanna an dawnah hian kum 2025, December 4 khan hemi chungchang hi sawi chhuah a nih thu tarlan a ni.

Sorkar laipui chuan National Education Policy (NEP) zulzuiin tun dinhmunah higher education awmsa thuam chak leh tihzauh an ngaih pawimawh thu an sawi. Nagaland-ah sorkar laipui fund hnuaiah institution pawimawh pahnih- Nagaland University leh National Institute of Technology Nagaland a awm tih an tarlang bawk. Pradhan Mantri Uchchatar Shiksha Abhiyan (PM-USHA) hnuaiah higher thuam chakna turin kum 2023-24 aṭanga 2025-26 chhungin Rs vbc 1,292.16 pawm a ni tawh tih an sawi bawk.

Hei bakah Rasgtriya Uchchatar Shiksha Abhiyan hnuaiahproject 39 thawhna tur Rs vbc 254.06 sanction a ni tawh tih tarlangin, heng zingah hian sorkar laipui aṭangin Rs vbc 229.57 pawh a tel. PM-USHA hnuaiah kumin March 25 khan Nagaland tan Rs vbc 130.46 sanction a ni tawh bawk. IIT dinna tura rawtna chungchangah Ministry chuan nikum January 1 khan ngaihtuah tur a nih thu sawiin, a sak hun tur erawh an tarlang lo. Nagaland-a IIT din tura ngenna chu awm chhunzawm zelin, ṭhalaite tana hun remchang siamsak bakah, state-a hmasawnna tichak turin a pawimawh tih an tarlang.