Tripura : Buaina chhuakin a nghawngte hnenah chhawmdawlna pe dawn

Tripura sorkar chuan Tripura Tribal Areas Autonomous District Council (TTAADC) inthlan vuakveta buaina chhuakin a nghawng chhungkaw 258 te chu sum lama ṭanpuina pek a nih tur thu a puang. State hmun eng emaw zatah buaina hi a la chhuah chhunzawm zel a ni.

TTAADC inthlan hi April 14 khan neih niin, April 17-ah result puan a ni. Tipra Motha chuan seat 28 awmah seat 24 lain hnehna an chang a, BJP-in seat li an la ve bawk.

Inthlan result chhuah hnu hian hmun eng emaw zatah buaina a chhuak a, he buaina hi Tipra Motha mi leh sate tihchhuah nia sawi a ni. Mahse he an puhna hi chiang zawka finfiah a la ni lo thung. Chenna in tam tak suasam a ni a, mi eng emaw zatin hliam an tuar bakah hmun him lamah an insawn chhuak bawk. Police-te chuan buaina chhuak hian chhungkaw 258 vel a nghawng tih an sawi a, state sorkar chuan chhungkua a nghawngte hnenah Rs 25,000 pek an nih tur thu a puang nghal bawk. District thuneitute chu ṭanpuina pawisa sem chhuah kalpui tur leh a hun taka peihfel tura hriattir an ni.

Buaina chhuakin a nghawngte ṭanpuina atan Rs nuai 64.5 sanction a ni a, RD block pariata chhungkuate pek an ni ang. Official-te chuan puihbawmna pek tur dang pawh ngaihtuah mek an ni tih an sawi. State sorkar chuan Tripura Recovery of Damages to Public and Private Property Act, 2021 hnuaiah hmalak a ni dawn tih a tarlang. Thuneitute chuan pawikhawihnaa inhnamhnawihte zawn chhuah an nih tur thu leh, hriat chhuah an nih hunah mipui a nghawngte compensation pe tura tih an ni dawn tih an sawi bawk.