Meghalaya: CM-INSPIRE scheme tlangzarh

Meghalaya sorkar chuan Union Public Service Commission (UPSC) exam tura inbuatsaih mekte puihna tur, CM-INSPIRE scheme a tlangzarh. Chief minister Conrad K Sangma chuan he hmalakna a puan rual hian, India civil service-a state aiawh leilung fa awm zat an tlakhniam zel avangin, ṭan lak thar a pawimawh thu a sawi.

CM Sangma chuan an scheme siam chu ṭhalaite thil tum tihhlawhtlinna tura hmalakna pawimawh tak a nih thu sawiin, kum tam tak state aiawha civil service exam hmachhawnte an hlawhtlin tawh loh avangin CM-INSPIRE scheme hmangin hma lak a ni dawn tih a sawi. He scheme hnuaiah hian UPSC Civil Service Preliminary exam-a tlingte chu Rs 50,000 pek an nih dawn bakah, mains exam-a tlingte chu Rs nuai 1 pek an ni dawn a ni. Sangma chuan he hmalakna hi candidate-ten sum lama harsatna an tawh ṭhin a sukiang dawn tih a sawi.

State sorkar chu ṭhalai civil service candidate-te pui turin a inpeih reng tih sawiin, an thil tumah inpekna nghet nei turin CM chuan a chah bawk. Candidate tlingte chuan dilna hawn a nih hunah Meghalaya Administrative Training Institute (MATI) portal kaltlangin dilna an theh lut thei dawn a ni.