Manipur : Digital platform pali tlangzarh

Manipur chief minister Yumnam Khemchand Singh chuan nimin khan, state khawpui Imphal-a Chief Minister's Secretariat Cabinet Hall-ah digital platform pali a tlangzarh. Platform-te hi department of information technology siam niin, inrelbawlna leh service delivery chak zawka pek chhuahna tura buatsaih a ni.

Portal palite chu Centralised RTI State Portal, e-Seba Manipur, Explore Manipur leh AI-enabled Scheme Finder-te an ni. He hmalakna hian sorkarin digital technology hmanga langtlang, rintlak leh mipui rawngbawlna kalpuina tura a ruahman a ni. Centralised RTI State Portal hmang hian mipui tan RTI dilna online-a theh luh leh zawn theih a ni ang. Portal hi Supreme Court-in online RTI system kalpui tura kum 2024 March 20-a thupek a siam zulzuia siam a ni a, portal-ah hian department leh administrative unit 287 leh Public Information officer 266 an awm tawh.

e-Seba hi sorkar service delivery thuam chakna tura buatsaih a ni. He platform-ah hian Revenue department leh Employment Exchange-a service pawimawh zingah domicile, income, SC/ST leh OB bakah hna kaihhnawih service kalpui a ni ang. Explore Manipur hi tourism, hmun pawimawh tlawh tur, market, transport leh sorkar service information atan hman a ni ang. AI-enebled Scheme Finder hian sorkar laipui leh state sorkar scheme awlsam takin a hriattir thei dawn bawk a ni.