Meghalaya : CM-in Nabon Memorial Home hawng

Meghalaya chief minister Conrad K Sangma chuan Inrinni khan Mawïong Rim-ah hmeichhia khawsak harsate leh chenna in nei lote awmna tur, Nabon Memorial Home a hawng. Helai hmun thuam chakna tur hian Chief Minister’s Special Development Fund (CMSDF) aṭangin Rs nuai 25 pek a nih tur thu a sawi bawk.

Nabon Memorial Home hi Shillong Ri-Lum Presbytery hnuaiah Jingiaseng Kynthei Shillong Ri-Lum Presbytery-in a din a ni. He home hi helai biala hmeichhiate chenna hmun him, enkawlna leh hmeichhe khawsak harsate puihna tura ruahman a ni. Home hming hi Khasi Hills-a hmeichhiate zinga kristian ni hmasa ber, Ka Nabon hming chawi tir a ni.

He hmalakna hi khawtlang nun siamṭhat kawnga hmalakna pawimawh tak a ni tih sawiin, Chief Minister chuan home chu beiseina leh lainatna hmun angin a thawk dawn tih a sawi. Home-ah hian hmeichhe khawsak harsa leh puibawmtu nei lote chu zahawmna, himna leh enkawlna dik tak nen chenna hmun him a siamsak dawn a ni, a ti.