Tripura : Ramakrishna Mission Vidyalaya UNESCO Associate School-ah puang

Tripura khawpui Agartala-a Ramakrishna Mission Vidyalaya, Viveknagar-a awm chu, zirna lama an hmingṭhat avangin UNESCO Associate School atan puan a ni. He chawimawina hi khawvel puma zirna quality ṭha leh hmasawnna nasa tak neite hlan ṭhin a ni.

Tripura finance minister hlui leh Maharashtra governor ni lai, Jishnu Dev Varma chuan he thu hi a social media-ah tarlangin, he institution inkaihhruai dan chu a fak a, khawvel pum hriat hlawh thei tura zirtirtute leh staff-te bakah zirlaite inpekna chu lawmawm a tih thu a tarlang. UNESCO Associate School atana Ramakrishna Mission Vidyalaya thlan a nihna hian zirna an kalpui danah Vidyalaya tihmingṭha a, a chawilar phah bakah, zirna in dangte pawhin zirna quality ṭha neih tura hma an lak phah beisei a ni.

Ramakrishna Mission Vidyalaya hi kum 1989-ah Central Board of Secondary Education hnuaiah din a ni. School classroom tinah smart board leh digital screen hman a ni a, laboratory bakah special ATL Lab chu workshop leh Robotic leh AI zirna atan dah a ni bawk. An school library-ah hian lehkhabu 12,000 chuang awmin, mi 900 vel lenna auditorium a nei bawk.