Manipur : CM-in all-party meet kaihruai

Manipur chief minister Yumnam Khemchand Singh chuan April 7 khan all-party meet kaihruaiin, tun hnaia Tronglaobi-a bomb hmanga inbeihna thleng vanga nunna chan an awm chu pawi an tih thu leh, he thil thleng hi na taka an dem thu an sawi. State pumah remna leh muanna a awm theih dan tur an sawi ho a ni.

Meeting hi Chief Minister Secretariat-ah neih niin, state-a dan leh thupek kalpui dan an thlir let. Tun hnaia pawikhawihna thleng chu mi dawihzep thiltih a nih thu tarlangin, party hrang hrang aiawhte chuan remna leh muanna vawn him a ṭul thu leh, khawtlangah buaina thlen lo zawnga mitin an awm a pawimawh tih an sawi. Meeting-a telte chuan state boruakin ziaawm lam a pan zel theihna turin sorkar chu an thawhpui chhunzawm zel dawn tih an sawi. Pawikhawihna thlenga inhnamhnawihte pawh zawn chhuah a, dan anga na taka hrem an nih ngei an phut.

Thuchhuah inṭawm an siamah, mipuite chu pawikhawihna leh buaina chhuak thei thil lakah inthiarfihlim turin an hriattir a, dan leh thupek kenkawh kawngah mipui thawhpuina pawimawhzia an tarlang bawk. Meeting-ah hian Bharatiya Janata Party, Indian National Congress, National People's Party, Naga People's Front leh Communist Party of India aiawhte an tel a ni. Chief minister hlui Okram Ibobi Singh leh deputy chief minister hlui Yumnam Joykumar Singh-te an tel bawk.

CM Singh chuan Tronglaobi-a bomb hmanga inbeihna state sorkarin National Investigation Agency (NIA) kutah a chhui zui tura hlan a tum thu a lo sawi tawh bawk a ni. He thutlukna hi Home Minister leh MLA-te nena an sawi ho hnuah an siam tih a tarlang. Pawikhawihna thlentute chu a rang thei anga bera man chhuah an tum tih a sawi.