Arunachal : Karnataka expert team-te sai awmna sawn turin tir

Karnataka aṭanga expert team member 12 awmna chuan Thawhṭanni khan Aruanchal Pradesh-a Tirap district-a Deomali an tlawh. Expert team hi kum hnih liamta chhunga district-a mihring tam tak thihna thlentu sai kawlh zawn chhuah leh sawn dan tur ngaihtuah tura tirh an ni.

Senior veterinary officer leh sai specialist, Dr Ramesha H kaihhruai team-ah hian tranquillisation, wildlife lama mithiam, elephant camp aṭanga train chhuakte an tel. Beihpui an thlakna turah hian kumki (trained) elephant leh thermal drone hmangin sai zawn chhuah leh him taka man theihna tur hmanrua hman a ni ang.

Forest official-te chuan he beihpui thlakna hi sai kawlhin mihring a tihbuai fo ṭhin avanga kalpui a nih thu sawiin, Deomali huam chhunga chengte chuan harsatna leh hlauhthawnna an tawk fo tih an tarlang. Sai kawlh hian legislator hlui Kapchen Rajkumar pawh a lo tihlum tawh a ni.

Deomali range forest officer (RFO), Diwang Lowang chuan mipuite chu sai an hmu emaw an awmna chin an hria a nih chuan Forest Department-ah thlen turin a hriattir a, beihpui thlakna hlawhtling tak neih a nih theihna turin an thawhpuina a ngen. Divisional Forest Officer (DFO) chuan forest and environment minister, Wangki Lowang chu wildlife expert leh support team-te sai kawlh zawng chhuak tura tirh kawnga hma a lak avangin lawmthu a hrilh bawk.