Meghalaya : CM-in 'Mission 1,000 days' tlangzarh

Meghalaya chief minister Conrad K Sangma chuan Thawhlehni khan Rs vbc 127 senna tur, 'Mission 1,000 Days' programme a tlangzarh. He hmalakna hi naupang ei leh in ṭha zawk pek, hrisel loh avanga ṭhang thei lo venna leh naupang hmasawnna tihpunna tura ruahman a ni.

Mission 1,000 Days programme hmalakna hmang hian nu in nau a pai aṭanga kum hnih thleng puihbawmna pek a ni dawn a, nu nau nei enkawlna thuamchak, chaw pek dan dik leh naupang hmasawnna tihchakna tur chu ngaih pawimawh ber a ni dawn a ni, tiin official-te chuan an sawi. State sorkar hmalakna hi department hrang hrang kalpui tura tih niin, chung zingah chuan Social Welfare, Health and Family Welfare, Community and Rural Development, Education leh Planning-te an tel.

Tlangzarh inkhawma thu a sawiah, CM Sangma chuan sorkarin mihring harsatna tawh ṭhin hrang hrang sutkian a tum thu leh, nu naupai leh naupang hriselna atana ṭangkaite chu ngaih pawimawh a nih thu a sawi. Mission mode programme chu feedback azirin thuamchak zel a ni dawn tih a tarlang bawk. Naupang chu an pian aṭanga ni 1,000 chhung an taksa leh hriatna lama hmasawnna atan a pawimawh hle tih sawiin, hmalakna hlawhtlinna turin stakeholder-te nen thawh hona ṭha tak neih a ṭul thu a sawi bawk.

Official-te chuan programme-ah hian frontline worker-te thiamna leh theihna tihpun, tualchhung ei leh in hmanga chaw hrisel siam, awareness campaign, nu leh naupang hriselna endikna tur technology hmante a tel tih an sawi. Chaw ṭha sem, training, nu leh nau piang hlim mamawh pekchhuahte chu an hmalakna tur zingah a tel a ni.