Assam: PM-in Dibrugarh-a thingpuife huan tlawh

Prime minister Narendra Modi chuan nimin Nilaini khan Assam-a Dibrugarh-a thingpuife huan a tlawh. A social media X-ahDibrugarh-a thingpuife huana hnathawk hmeichhiate nen inbiakna ṭha tak an neih thu sawiin, hnathawk chhungkuate taimakna fakin, an thawhrimna chuan Assam a tihmingṭha tih a tarlang bawk. Assam State Portal chuan kumtin thingpuife kg mtd 630-700 an thar chhuak tih tarlangin, ram puma thar chhuah chanve aiin a tam a ni.

Prime Minister hian nimin vek khan Dhemaji-a Gogamukh-ah leh Biswanath district-a public meeting neihah thu a sawi bawk. BJP hruaitute leh state minister-ten an telpui a ni. PM hi Assam assembly inthlan neih tura Dhemaji leh Dhakuakha assembly bial candidate Ranoj Pegu leh Naba Kumar Doley-te tan leh, Behali-ah party candidate leh minister hlui Pallab Lochan Das-te tan a campaign a ni. BJP hian inthlan neih tur atana an party manifesto an tlangzarh tawh a, an hmalakna tur an tarlan zingah Union Civil Code hman pawh a tel.

PM chuan Assam-a BJP kaihhruai NDA sorkar hnathawh tawh dan hrang hrangte tarlangin, kum 10 chhungin welfare scheme leh inrelbawlna ṭha zawk siam a ni, a ti. NDA sorkar hnuah state chhunga mi rethei zawk chhungkua nuai 22 chuangin in an nei tawh tih a sawi a, infrastructure lamah pawh hmuh theihin hmasawnna a thleng a ni, a ti.

Assam assembly inthlan hi April 9-ah neih a ni dawn a, May 4-ah vote chhiar a ni ang. Assam-ah hian kum 2016 aṭang khan BJP kaihhruai NDA chuan sorkarna an la chan chhunzawm zel a ni.