Manipur : IDP-ten an pawisa dawn pe kir

Manipur-a Ekou khuaa tualchhung buaina avanga chenna in leh lo chhuahsan, internally displaced persons (IDPs) te chuan rehabilitation scheme hnuaia chenna in sakṭhatna tur an dawn chu a tlem tham tia pawm duh loin, Rs nuai 24 chu thuneitute hnenah an pe kir.

IDP-te hi tun dinhmunah sorkar enkawl Sajiwa leh Sawombung-a relief camp-a khawsa mek niin, Sawombung Junior Block Development Officer (BDO) office-ah pawisa hi an pe kir a ni. Ekou khua hi Kangpokpi district inrina tlang bulṭhuta awm a ni a, state-a hnam leh hnam inkara buaina chhuak tuar nasa ber zingah a tel.

State sorkar chuan chhawmdawlna kalpuiin, chenna in tihchhiat sak ṭhatna atan chhungkaw tin hnenah Rs nuai 3 pek an ni. Chhawmdawlna sum hi Pradhan Mantri Awas Yojana-Gramin (PMAY-G) hnuaiah Rs nuai 1.30 leh State Home Department aṭangin Rs nuai 1.70 a huam a ni. Scheme kalpui mek zingah Direct Benefit Transfer (DBT) hmangin a chhawr ṭangkaitu hnenah installment Rs 48,000 dah a ni tawh bawk.

Ekou khaw IDP-te chuan ṭanpuina sum, chhungkaw pakhat tana Rs nuai 3 pek chu chenna in sakṭhatna atan a tlem tham an tih avangin an pawm duh lo a, Imphal East district thuneitute hnenah ṭanpuina sum chu an account-a dahsak lo tura ngenna an thehlut tawh tih an sawi. Official-te chuan kumin January thla chawhnu lam thleng khan IDP chhungkua aṭanga mi 16,500-te chu Manipur hmun hrang hrangah relief camp aṭanga sawn chhuah an ni tawh tih tarlangin, Ekou khuaa IDP-te erawh an chenna in leh loah an la kir lo thung.