Meghalaya : CM-in welfare programme kalpuina tur puang

Meghalaya chief minister Conrad K Sangma chuan, thingtlang khawsak chawikanna leh community infrastructure thuam chakna atan March 28 khan welfare programme hrang hrang kalpuina tur Rs vbc 130 chuang a puang. Hei hi mi 27,700 chuangin an chhawr ṭangkai thei dawn a ni.

CM chuan welfare programme hi Shillong-a Polo Ground-a hun hmanah puangin, Chief Minister hi agriculture leh farmers' welfare minister Timothy D Shira leh MLA Celestine Lyngdoh-ten an telpui. Fund hi hmalakna pawimawh hrang hrang zingah FOCUS+, GREEN Meghalaya+, LIFCOM, MegLIFE, Floriculture Mission leh CM ELEVATE-a hman atan sem a ni ang.

Sangma chuan CM ELEVATE hnuaiah MegLIFE community hall 128, warehouse 34 leh common facility centre pali a hawng nghal a ni. Hamṭhatna huang zauh a nih thu sawiin, kum 2018 aṭangin scheme 30 chuang kalpui a ni a, state-a mi nuai 8 velin an chhawr ṭangkai tih a sawi. Scheme hrang hrang zingah FOCUS+, CM Safe Motherhood Scheme leh CM ELEVATE chuan loneitu nuai 1.05, hmeichhia 13,169, entrepreneur 3,600 leh zirlai 98,751-te puihbawmna a pe tih a tarlang.

Official-te chuan FOCUS+ hnuaiah kumin March 4 thleng khan mi 24,400 hnenah Rs vbc 6.04 pek chhuah a ni tawh tih an sawi bawk. GREEN Meghalaya+ programme hnuaiah mi 2,700 hnenah Rs vbc 25.54 pek a ni tawh a, he scheme hnuaia sum an sem chhuah tawh zat chu Rs vbc 180 a tling tawh a ni.