Arunachal : Inter-state-a mihring hralh ruknaah hmeichhia pasarih chhanchhuak

Arunachal Pradesh police-te chuan Banderdewa-a mihring hralh rukna do kawnga hma an laknaah, hmeichhia pasarih chhanchhuakin pawikhawihnaa inhnamhnawih mi pahnih an man.

Naharlagun SP Nyelam Nega chuan an thudawn bawhzuiin NK Lodge leh Lovely Lodging an dapnaah hmeichhiate hi an chhan chhuah thu sawiin, mipat hmeichhiatna lamhawi (sexual work) a thawk tura rukbo an nih thu a sawi. Police-te chuan an mi chhanchhuah tam zawk chu Assam mi an nih thu leh, khawsak hnuaihnung leh harsa tak tak an ni a, dawt hmanga bum chhuah an nih thu a sawi.

Hmeichhia rukbote an hmuhna, NK Lodge neitu Kuru Richo chuan a lodge hi Nazrul Islam hman hawh tirin, manager Moina Das chuan room paruk chu thla riat liamta aṭang khan mihring hralhrukna leh a kaihhnawih atan hman a nih thu an tarlang bawk. Lovely Lodging neitu Nalo, Tagin Baido tiha hriat chuan a lodge hi Tate Taha hman hawh tir bawkin, hemi hnuah Fardaus Ahmed hnenah hman hawh tir lehchhawng a ni.

Police-ten chhui zuina an neihah Ahmed chuan thla thum aṭanga thla li liam ta chhungin he hmun hi hetiang pawikhawihna kaihhnawih atan hman a nih tawh thu a sawi. He thil thleng kaihhanwihah hian Moina Das (34) Dhemajit district-a cheng leh Fardaus Ahmed (35), Assam-a Morigaon district-a chengte chu man nghal an ni a, an pahnih hian Immortal Traffic (Prevention) Act, 1956 hnuaiah thubuai siamsak an ni.