Tripura : Sikul 450-ah pre-primary unit hawng dawn

Tripura sorkar chuan kum 2026-27 academic session aṭangin sorkar sikul 450-ah pre-primary unit a hawng dawn. He hmalakna hi naupangte zirna tihchakna tur a ni tih nimin khan official-te chuan an sawi.

Official chuan Tripura-ah kum 2018 thleng khan pre-primary school 9 chauh a awm tih sawiin, hemi hnuah hetiang institution hi 236 din a ni tawh a, tuna an hmalakna hi tihpuitlin a nih hunah chuan sorkar sikula pre-primary facility awm zawng zawng chu 695-ah a kai chho dawn tih a tarlang.

Elementary Education director Rajob Datta chuan District Education Officer (DEO) zawng zawngte chu department kaihhruaina hnuaiah pre-primary unit din kawngah hma la turin a hriattir. Pre-primary unit huang zauh chu National Education Policy (NEP) zulzuia kalpui a nih thu sawiin, state puma zirlai naupang inziaklut an pun theihna tura ruahman a ni tih a sawi bawk.

Tun dinhmunah Tripura-ah hian sikul 4,800 a awm mek a ni. Kumin March 19-a official memorandum tihchhuahah, headmaster, principal, zirtirtu, management committee, nu leh pa leh khawtlang hruaitute chu academic session tharah nursery admission buaipui tura tih an ni. Pre-primary unit hlawhtling taka hawn a nih theihna turin DEO-te chu a ṭul anga thlawpna pe tura tih an ni a, an hmalaknate theh lut tura hriattir an ni bawk. Memorandum-ah hian pre-primary unit hawn chungchanga harsatna awm chu District Education Officer hrang hrang kaltlanga ngaihtuah tur a nih thu tarlan a ni.