Manipur : Bishnupur district-ah inkahna thleng

Manipur-a Bishnupur district-a security force-te leh helpawl nia rinhlelhte chu Nilaini zan khan an inkap a, minute 30 chhung vel an inkap niin official-te chuan an sawi.

Kuki helpawl nia rinhlelhte chuan Phouljang/Gothol huam chhungah Phougakchao Leikai-a Indian Army post an kap a, security force-te hian an lo chhanglet ve nghal a ni. Police-te chuan he thil thlen hun hi Nilaini zan dar 11:40 vel a nih thu leh sawiin, Indian Army leh Central Reserve Police Force 58th Battalion-te chu helai hmunah hian tirh nghal an ni. Thi leh hliam an awm lo nia report a ni bawk.

Nimin khan Indian Army, CRPF, state police leh Indian Reserve Battalion (IRB) thawk ho chuan silai hmehpuahna leh a chhehvelah hel ho dapin beihpui an thlak tih police thuchhuah chuan a tarlang. Security force-te chuan venhim hna an kalpui chhunzawm bawk. Thuneitute chuan mipuite chu thudik lo thehdarh lo tur leh, midang hriata puanzar a nih dawnin thu belhchian dawl a nih leh nih loh hrechiang hmasa phawt turin an ngen.