Tripura: Social media-a Chief Minister tihhmingchhiatna post vangin mi 3 man

Tripura police-te chuan chief minister Manik Saha sawichhiatna leh tihhmingchhiatna content social media-a post siamtu mi pathum an man. An thil post-ah hian artificial intelligence hmanrua an hmang tel nia report a ni.

Sabroom Police Station officer-te chuan South Tripura-a Kalachhara huam chhungah pawikhawihtu zinga pakhat, Subi Ray Tripura, 32 chu manin chhuizuina nei turin police station-ah hruai a ni tih an tarlang.

Subi Ray Tripura hi chipchiar zawka chhuizuina nei turin West Agartala Police Station-ah sawn leh a ni. Police-te chuan he thubuaia inhnamhnawih pahnih dang chu Agartala aṭanga man an nih tawh thu an sawi bawk a, an mi mante hi Nandan Nagar-a cheng Mongol Koloi leh Airport huam chhunga cheng Dipak Kumar Pal-te an ni.

Police-te chuan digital platform dik lo taka hman leh, intihhmingchhiatna thubuai chu cyber dan leh section hrang hrang hmangin an ziak lut a ni. He pawikhawihnaa inhnamhnawih dang an la awm leh awm loh chhuizuina neih zel a ni bawk. AI technology dik lo taka hman bakah, midang tihmingchhe thei social media-a thehdarh a pun zel avangin thuneitute chuan digital platform hman chungchangah khauh lehzuala hmalak a ṭul tih an sawi.