Manipur : KZC Chairman chenna inah venhimna khauh zawkin kalpui

Manipur-a Kuki-Zo Council (KZC) chairman, Henlianthang Thanglet chenna in Pathianni zana tualchhung ṭhalai pungkhawmin an beih hnuah security force-te chu venhimna khauh zawka kalpui turin nimin Thawhṭanni khan tirh an ni.

Chairman chenna in hi Pathianni chawhnu lam pawh khan lung hmangin an bei a, pungkhawmte chu inchhunga luh an tum bawk. Security-te chuan mipui hnawhdarhna atan tear gas an hmang a, pungkhawmte hnawhdarh an nih hnuah buaina chhuak chhunzawm a awm lo tih official-te chuan an sawi.

He thil thleng hi state chief minister Yumnam Khemchand Singh leh Kuki-Zo Council hruaitute Guwahati-a meeting an neih zawh tuka thleng a ni. Meeting hi darkar khat leh minute 45 vel awh niin, state-a hnam leh hnam inkara buaina chhuah kum thum dawn a liam hnua state sorkar leh council inbiak vawikhatna a ni bawk.

Official thuchhuahah Meitei leh Kuki-Zo mipui inkara buaina chhuak tihtawpna tura inbiakna hi neih a ni. KZC aiawhte chuan Kuki leh Tangkhul mipui inkara buaina chhuak tihtawpna tura hmalakna an neihte an sawi bakah, buaina chhuakin a nghawngte dikna chanvo humhim bakah, remna leh muanna awm theihna tura rintlak zawka hmalak an sawi ho bawk.

Kum 2023 May thlaa Manipur-a Meitei leh Kuki-Zo hnam inkara buaina chhuak vang khan mi 260 chuangin nunna an chan a, tun thlengin state chhung boruak hian ngai a la awh thei lo. Kum 2025 February thlaah President's Rule-ah niin, kumin February htla khan CM Singh kaihhruai sorkar thar a ding a ni.