Meghalaya : KSU-in Vande Mataram sak tir tum duh lo

Khasi Students' Union (KSU) chuan sorkar laipuiin sikul leh sorkar function neihna hrang hrangah national song, Vande Mataram full version sa tura thupek a tihchhuah chu duh loin, duh lohna lantira nawrh huaihawtah an vaukhan.

Zirlai pawl chuan an member-te chu Vande Mataram sak luih tirna a awm chuan enfiah a, lungawi lohna lantir turin an ti. National song-a a chang tawp lamah Hindu pathiante fakna lam telh a ni a, hei hi state leilung fa tribal-te rinna nena inkalh a ni, an ti. Vande Mataram-a chang hmasa pahnihte chauh chu India chungchang sawina niin, a bakte chu Hindu sakhaw lam kaihhnawih vek niin an tarlang.

KSU president Lambokstarwell Marngnar chuan an pawl chuan an state leilung fate nihna leh inpumkhatna vawnghim turin an bei zel dawn tih a sawi. General secretary, Donald V Thabah pawhin Vande Mataram sak luih tir tum chu an culture chimralna tur a ni tiin, lo dodal chu thil ṭul a nih thu a sawi. "He hla min sak tir kan remtih chuan, eng tikah emaw chuan an thuhnuaiah min dah mai dawn a ni," a ti.

Ministry of Home Affairs (MHA) chuan January 28 khan thupek tichhuakin zirna in leh sorkar function neihah Bankim Chandra Chattopadhyay-a phuah, Vande Mataram chu a chang pumpui, chang ruk chu sa ziah turin a ti a ni. National song leh national anthem sakna tur hunah pawh, national song chu sak hmasak ziah turin a ti bawk.

Sorkar laipuiin Vande Mataram chang pumpui sa tura thupek a siam hian sawi zui a hlawh hle. Nagaland-a zirlai pawl pawhin an sakhaw rinna leh culture nena inmil lo tiin an duh loh thu an lo sawi tawh bawk a ni.