Sikkim : Thlipui leh rial tlain nunphung tibuai

Sikkim hmun hrang hranga Pathiannia thlipui tleh leh rial tla chuan chhiatna nasa tak thlenin, hmeichhe pakhat a thih bakah mi dang eng emaw zatin hliam an tuar a, hmun ṭhenkhatah power supply an nei lo bawk.

Gangtok district administration chuan Kala Devi Chettri, 55 chu Rakdang-Kafer huam chhunga thing tluin a delh hnuah a thi tih an sawi. Pakyong district-a thing tluin motor a delhna lamah mi pathumin hliam an tuar a, damdawi-in panpui nghal an ni. State power department official-te chuan Pathiannia thlipui leh rial tla hian power transmission system a tichhia tih sawiin, 66kV transmission line eng emaw zat a chhiat avangin hmun hrang hrangah electric supply a khaihlak tih an sawi. Pakyong district-ah hian 66kV Rorathang-Rongli tranmission line a chhiat avangin Rongli leh Rhenock-ah electric supply an pe chhuak thei lo tih an sawi.

Gangtok district-a Namli area bula 66kV Marchak-Macleods transmission a puah avangin Nimtar, Topakhani, Singtam leh Khamdong huam chhungah power supply an nei lo bawk . Mangan district-a G.B. Pant Wildlife Santuary bula 66 kV Perbing-Phodong tranmission line a puah avangin district hmun hrang hrangah power supply a khaihlak bawk a ni. Chhiatna a thlenna hmunah power supply siamṭha turin team tirh an nih tawh thu official-te chuan an sawi. Indian Meteorological Department (IMD) chuan yellow (primary) warning chu state hmun ṭhenkhatah an puang tawh bawk.