Manipur : Assembly-ah health service leh IDP chungchang sawi

Manipur Legislative Assembly nimin Thawhlehnia neihah healthcare service leh, tualchhung buaina avanga chenna in leh lo chhuahsan internally displaced persons (IDP) te sawn chhuah bakah, legislative leh inrelbawlnaa thuthar awmte sawi ho a ni. Session-ah hian chief minister Yumnam Khemchand Singh chuan Manipur Information Commission 16th annual report (2022-23) a pharh bawk.

IDP-te relief camp aṭanga sawn chhuah pawh ṭan a ni tawh tih sawiin, Chief Minister chuan Kakching district-a contractor tual thihna chu chhuizui mek a nih thu a tarlang. Infrastructure chungchanga zawhna a chhannaah, Sawombung-Sagolmang-Keibi kawng project-ah contractor-te chu Rs nuai 1,669 pek an ni tawh tih a sawi. Tun hnaia rial tlain chhiatna a thlenah Deputy Commissioner-te chu chhungkua harsatna tawkte puihbawmna pe tura hriattir an ni, a ti.

CM chuan state-a nau piang thi zat chu ram pum nen tehkhinin a tlahniam tih a sawi. Awareness programme 1,000 chuang buatsaih a nih thu leh, thingtlang lama healthcare service chu ngaih pawimawh a ni, a ti. Primary Health Centre (PHC) 93 sanction a ni a, chung zinga 86 chu hman ṭan a nih tawh thu a sawi bawk. Sorkar chuan IDP-te hnenah health card a sem chhuak a, rilru lam hriselna atan enkawlna pek an ni tih tarlangin, damlo nuai 30 velin National Health Mission hnuaiah a thlawnin enkawlna an dawng tih a sawi bawk.