Meghalaya : GHADC chief executive member Albinush Marak a bang

Meghalaya-a Garo Hills Autonomous District Council (GHADC) chief executive member (CEM), Albinush R. Marak chu a laka no-confidence motion ruahman a nih hmain nimin March 16 khan a bang. Marak hian a banna lehkha hi GHADC Chairman hnenah a theh lut a ni.

March 16-a banna lehkha a theh luhah hian Marak chuan, Chief Executive Member a nihna aṭangin a bang nghal tih a tarlang. CEM a nih chhungin Garo Hills hmasawnna atan rinawm takin hna a thawk ṭhin tih a sawi a, a kaihhruaina hnuaia Executive Committee chuan Garo Hills mipui phut angin dan leh thupek pawimawh siam leh kalpui lamah hma a la tih a sawi bawk. Mipui rawngbawlna leh Council inrelbawlna tihchak tumin hmalakna leh hmasawnna kawng tam tak a kalpui tih lehkhaah hian a sawi a, hemi rual hian hmalakna leh hmasawnna tur eng emaw zat erawh harsatna an tawh avangin tihpuitlin a ni hman lo tih a tarlang.

GHADC member tam zawk chuan Marak kaihhruaina hi an ring tawk tawh lo a, a lakah rin tawk lohna motion puh luh an tum a ni. Mahse, motion put luh a nih hmain a bang ta zawk a ni. Marak chuan a nihna aṭang hian bang mah se, mipui tan hna a thawk chhunzawm zel dawn tih a sawi a ni.