Manipur : Ruahsur nasa leh rial tlain chhiatna thlen

Manipur hmun hrang hranga Pathiannia ruah leh rial thawkin chhiatna nasa tak a thlen a, hmun tam takah power supply an nei lo mek a, an thlai chinte pawh a chhe nasa hle.

Inrinni leh Pathianni zana thlipui tleh hi Bishnupur leh Kakching district-ten an tuar nasa zual a ni. Mihring thi leh hliam erawh an awm lo nia report a ni.

Chief minister Yumnam Khemchand Singh chuan official-te chu a ṭul anga hma la turin a hriattir nghal. Official-te chu chhungkua leh khawtlanga harsatna tawk mekte a rang lama puihbawmna pe turin hriattir an ni tih CM chuan a social media X-ah a tarlang. Relief team-te chu ṭanpuina leh mipui mamawh pe tura tirh an ni tawh a, sorkar pawh chhiatnain a nghawng mipui pui turin leh, an dinhmun ngun taka thlithlai sak reng an nih thu a tarlang.

Bishnupur district-a Loktak lui bul Moirang Phiwangbam leh Thanga-Ngaram-a chenna inte chu a chhe nasa hle a; Thoubal district-a Tentha huam chhung, Kakching district-a Sekmaijin-ah leh Champu Kangpok-ah pawh chhiatna nasa tak a thleng bawk.

Pathiannia public advisory tihchhuahah, district thuneitute chu loneitute leh pawn lama hnathawkte chu fimkhur tura chahin, ruahsur nasat laiin ṭul loah zin chhuak lo turin an ngen. Mipuite pawh thil pawimawhah lo chuan an chenna in chhuahsan lo turin an chah bawk a, emergency kit leh mamawh dang kawl reng tura hriattir an ni a, tuilian leh leimin thlen theihna bulhnaia kal lo tura hriattir an ni.