April 9-ah Assam assembly inthlang dawn

Election Commission of India (ECI) chuan Pathianni khan Assam Legislative assembly inthlan chu April 9-ah neih a nih dawn thu leh, May 4-ah vote chhiar a ni dawn tih a puang. Model Code of Conduct (MCC) chu he thu puan a nih rual hian state-ah hman ṭan nghal a ni.

Chief election commissioner Gyanesh Kumar chuan Assam leh state dang pali- Kerala, Tamil Nadu, West Bengal leh Puducherry-a vote thlak hun tur hi a puang a ni.

Inthlan kaihhnawiha hriattirna chu nimin March 16-ah tihchhuah nghal a ni a, inthlana chuh tumte tana nomination theh luh hun hi nimin aṭang khan hawng nghalin, March 23 thleng theh luh theih a ni ang. Nomination paper-te hi March 24-ah endik a ni dawn a, March 26 thleng candidate inhnuhdawh theih hun hawn a ni dawn bawk. Kumin Assam Assembly inthlan hi kum sawm hnua thawh khata inthlan neih a nih lehna hmasa ber tur a ni ang.

Assam assembly-ah hian seat seat 126 a awm a, heng zinga seat pakua chu Schedule Caste tan dah a ni a, Scheduled Tribe tan seat 19 dah a ni bawk. Electoral list tihchhuah hnuhnung berah vote nei mi maktaduai 2.50 vel an awm. An zingah hian kum 18 tling thar,a vawi khatna atana vote thlak tur nuai 5.75 an awm. Pianphunga rualbanlo nuai 4.16, third gender 343 leh kum 60 chung lam nuai 1.04 an awm bawk.

Vote thlakna tur polling station hi 31,486 siam a ni ang. Inthlan neih tur atana campaign theih hun hi April 7 tlai dar 5 thleng a ni ang. Kum 2021 assembly inthlanah khan BJP kaihhruai National Democratic Alliance (NDA) chaun seat 75 lain sorkarna an siam a, BJP chu party mala seat la hnem ber niin MLA 60 a nei a ni.