PM Modi-a'n Assam a tlawh dawn

Prime minister Narendra Modi chuan March 13 leh 14 hian hmasawnna project hrang hrang hawng turin leh, tea garden community-te hnena land rights certificate hlan turin Assam a tlawh dawn tih chief minister Himanta Biswa Sarma chuan a sawi. Guwahati-a press conference a neihah Sarma chuan PM hian Rs vbc 10,000 hu project a hawng dawn tih a sawi a ni.

PM Modi hian Kokrajhar a tlawh hmasa ber dawn a, hmasawnna project eng emaw zat lungphum a phum dawn bakah a hawng bawk ang. March 13-ah Guwahati-a programme buatsaihah a tel dawn a, hetah hian Pradhan Mantri Kisan Samman Nidhi (PM-KISAN) scheme instalment a hawng dawn a, Assam-a kum 200 dawn lo awm tawh tea garden community, ram mumal la nei lote hnenah land rights certificate a hlan bawk ang.

March 14-ah PM hian Silchar tlawhin Rs vbc 22,000 senga sak tur Silchar-Shillong-Guwahati Express Highway lungphum a phum dawn a ni. Hei bakah state sorkar project MW 150 Kopili Hydro Power Project a hawng bawk ang. Prime Minister hian Kokrajhar, Guwahati leh Silchar-a vantlang inkhawm buatsaihah thu a sawi nghal dawn bawk.

Union home minister Amit Shah pawhin March 15 hian Assam a tlawh dawn a, Guwahati-a Pragjyotishpur Medical College a hawn dawn bakah, Bharatiya Janata Party (BJP) buatsaih Yuva Sankalp Samavesh-ah a tel ang. Khanapara-a Veterinary College Field-a hun hman turah hian BJP ṭhalai nuai khat vel an tel tura beisei a ni tih state BJP unit chuan a tarlang.