Udyam portal-ah enterprise 48,655 ziah luh a ni : Nagaland CM

Nagaland chief minister Neiphiu Rio chuan Thawhlehni khan state-a Udyam portal-ah enterprise 48,655 ziah luh an nih tawh thu a sawi. Heng zinga enterprise 48,464 chu micro enterprise, nano enterprise hnuaia mi an ni a, 175 chu small enterprise niin 16 chu medium enterprise an ni tih a tarlang.

14th Nagaland assembly session neih mekah state economy tihhmasawnna tura MSME chanvo sawi honaah hemi chungchang hi CM chuan a tarlang a ni. Rio chuan MSME sector chu muangchanga tihzauh a nih thu leh, enterprise hmasawnna tura sorkar hmalaknate a sawi lang. CM Micro Finance Initiative (CMMFI) hnuaiah MSME unit 777 din a ni tawh a, sorkar puihnain Rs vbc 65 invest a nih tawh thu a sawi.

Enterprise zinga transport service, retail trade, hospitality leh thil siam chhuahna tenau zawkte chuan state pumah direct-a hnathawh tur 1,500 a siam beisei a nih thu a sawi. Hei bakah MSME hmasawnna project 13 chu kalpui tura ruahman mek a nih thu CM chuan sawiin, MSME project dangte pawh Union Ministry pawmpui tura theh luh an nih tawh thu a tarlang.