Arunachal : Military station bula ramngawah kangmei chhuak

Arunachal Pradesh-a East Siang district-a Sigar military station bul ramngawah kangmei nasa tak chhuakin, kangmei ṭhelh tur hian Indian Air Force helicopter an tir tih official-te chuan March 8, Pathianni khan an sawi. Inrinnia military station bul ramngawa kangmei chhuak hi a darh chak hle a, mahse thi leh hliam erawh an awm lo.

Official-te chuan district administration leh Indian Army-te chu kangmei ṭhelh tur hian tirh an nih thu leh, kangmei thunun tur hian theihtawp an chhuah tih an tarlang. Mahse, a hmunhmain a zir loh avangin kangmei ṭhelh chu a awlsam lo tih an sawi bawk. Kangṭhelh team-ten harsatna an tawh avangin state sorkar chuan Indian Air Force helicopter an tir ta a ni.

IAF helicopter chuan Pathianni khan Siang lui tui hmangin kangmei ṭhelh hna ṭanin, an khawl thilah buaina an tawh leh avangin kang ṭhelh hna chu chawlh lailawk a ni a, nimin Thawhṭanni zing khan helicopter hmang hian ṭhelh chhunzawm leh a ni. Hetih mek lai hian kangṭhelh team-te chuan ram kang hi an ṭhelh chhunzawm reng bawk a, kangmei hi a darh zau zel lohna turin theihtawp chhuah a nih thu thuneitute chuan an sawi.