Assam : Sorkar leh Invest India in meeting nei

Assam sorkar leh Invest India chuan March 8, Pathianni khan Guwahati-ah meeting neiin, state-a foreign direct investment (FDI) tihpunna tura hmalakna an sawi ho. Sawi hona hi Ravi Kota leh Nivruti Rai-te chuan kaihhruaiin, sector hrang hranga state-a investment tam zawk luh theihna tur kawng hrang hrang dap a ni.

Meeting-ah hian Nivruti Rai chuan Invest India-in national investment promotion and facilitation agency-a chanvo a neih dan a tarlang. Ministry of Commerce and Industry huang chhunga Department for Promotion of Industry and Internal Trade hnuaia mi, Invest India hian ram chhung leh ram pawn investor-te tan hna pawimawh tak thawkin, investor-te chu investment an neih chhungin a pui a, ram chhunga investment hlawhtling tak tak kalpui turin kaihhruaina a pe ṭhin.

Ravi Kota chuan Assam chuan industry hrang hrangah investment tih theihna tur a ngah tih sawiin; defence, aerospace leh pharmaceutical-te chu sector pawimawh zinga mi an nih thu a tarlang. Hei bakah tourism, agriculture, petrochemical, semiconductor leh hydropower-te pawhin state-a FDI hip theihna an nei tih a sawi bawk. Kota chuan Assam chu investment lamah a ṭhang chak hle tih sawiin, infrastructure hmasawnna leh hmarchhak biala hmun pawimawh a nihnate a sawi lang.

State sorkar leh Invest India chuan ram dang aṭanga investment hip turin sector thlan bikah thawh dunna siam an remti a, Assam-in hmasawnna a neihna sector-te chu ngaih pawimawh an ni.