Tripura : Sorkarin health infrastructure thuam chak ngaipawimawh

Tripura chief minister Manik Saha chuan Ningani khan state sorkarin healthcare infrastructure thuam chak leh state puma medical service ṭha zawka kalpui a ngai pawimawh tih a sawi. Govind Ballabh Pant Hospital (GB Pant Hospital) a press conference a neihah, Chief Minister chuan super speciality service tihzauh leh critical care facility tichangtlung turin sorkarin ruahmanna a siam tih a tarlang.

CM Saha chuan sorkarin health sector chu a ngaih pawimawh ber thu sawiin, GB Pant Hospital chu apex tertiary care center anga kalpui a ni a, state-a mipui nuai 42 vel a enkawl tih a sawi. Healthcare mamawhna sang zel phuhruk thei tur infrastructure, hnathawk leh service tihchangtlun tumin hmalak mek a ni, a ti.

Tun dinhmunah GB Pant Hospital hian NICU-ah khum 21, ICU-ah khum 116 a nei mek. All India Institute of Medical Sciences (AIIMS) nen memorandum of understanding (MoU) an ziah hmangin ICU chu khum 320 leng tura tihzauh a ni dawn a ni. Chief Minister chuan he an hmachhawp tihlawhtling tur hian hma an la mek tih sawi. Tunhnai khan Respiratory and Geriatric ICU khum 16 awmna hawn niin, Trauma Centre Operation Theatre pawh hman ṭan tawh a ni. Labour room sak ṭhat pawh hawn a ni tawh bawk.

Saha chuan damdawi-ina khum chu 727 aṭangin 1,413-ah tihpun a ni a, ICU-a khum 156 pawh hman ṭan a nih tawh thu a sawi. AGMC leh GB Pant-ah critical care leh communicable disease centre pawh sak ṭan mek a nih thu a sawi bakah, MBBS seat pawh tihpun a nih tur thu leh, AIIMS an thawhpuinain telemedicine service an kalpui tawh tih a tarlang.