Manipur : March 9-ah Assembly budget session ṭan dawn

Manipur Legislative Assembly budget session chu March 9 ah ṭan a ni dawn. Session neih hun chhung tur hi tarlan a la ni lo a, kar khat chhung vel neih tura ruahman a ni tih official-te chuan an sawi.

President's Rule tihtawp a nih hnua sorkar thar a din hnuah, ni khat awh assembly session February 5 khan neih a lo ni tawh a ni. Holi festival zawhah budget session neih a ni dawn tih a sawi a nih hnuah a hun tur hi puan a ni ta a ni. Chief secretary Punee Kumar Goel chuan sorkar department zawng zawng chu 2025-26 Annual Administrative Reports theh lut vek turin a hriattir bawk.

CM-in cabinet meeting kaihruai

Manipur chief minister Yumnam Khemchand Singh chuan Council of Ministers-te an department chanpual sem an nih hnuah, Nilaini khan Secretariat-ah cabinet meeting a kaihruai. Meeting-ah hian Chief Minister chuan inrelbawlna pawimawh tak tak kalpui tura ruahmanna siam a nih thu sawiin, sorkarin remna leh muanna, venhimna leh mitin huap hmasawnna a ngaipawimawh tih a tarlang.

State-in hmasawnna ngelnghet leh mipuiin hamṭhatna an neih theihna turin ṭanrual a ṭul thu CM chuan a sawi. Chanpual an insemah Chief Minister hian department pariat changin, deputy chief minister Nemcha Kipgen chu Rural Development and Panchayati Raj bakah Tribal Affairs and Hills enkawl tura tih a ni a, Losii Dikho chuan Public Health Engineering department leh Forests, Environment, and Climate Change enkawl tura tih a ni. CM Khemchand chuan ministry tihzauh chu Yaoshang festival zawhah neih a beisei tih a sawi bawk.