CAA-a Sikkim tel loh chhan zawt

Sikkim-a political party phnih, Hamro Sikkim Party (HSP) leh Sikkim Sangram Parishad (SSP) chuan joint press conference an neihnaah Citizen­ship Amendment Act, 2019 chu an duh loh thu an sawi. 

HSP working president Bhai­chung Bhutia chuan he Act hian Sikkim mipuite rilru a tibuai hle tih sawiin, union home minister Amit Shah khan a hmain CAB hian Sikkim a huam tel dawn lo tih lo sawi mah se, Act tharah hian Sikkim chungchangah engmah inziak a awm lo niin a sawi. 

Bhutia chuan CAA in Sikkim a huam loh thu inziak a awm loh avangin, an state chu a huam tel ngei nia an ngaih thu a sawi. hei hi an duh lo tih sawiin, CAA chu Sikkim mipuite tana thil ṭha lo, hun lo kal zel turah pawh nghawng ṭha lo tak nei tur a ni,  a ti. Hei vang hian CAA chu eng  kawng mahin an pawm thei dawn lo tih a sawi. 

SSP senior vice president Kamal Rai pawhin CAA chung­changah chuan SSP leh HSP chu an ngaihdan a thuhmun tih sawiin, party pahnihte chuan sorkar laipuiah pawh thlenin  he dan an duh loh thu hi an hrilh nawn leh dawn tih a sawi a ni.