Manipur : Deputy CM leh minister-te department chan tur ruat

Manipur sorkar chuan chief minister, deputy chief minister pahnih leh minister dang pahnihte department enkawl tur a ruat. Chief minister Yuman Khemchand Singh chuan department pariat a enkawl dawn a, deputy CM Nemcha Kipgen chu rural and panchayati raj development bakah hill and tribal affairs enkawl tura tih niin, deputy CM dang Losii Dikho chuan public health engineering and forest, environment and climate change department a enkawl dawn a ni.

CM leh deputy CM pahnih bakah, minister pahnih chanpual tur ruat niin, home department leh youth affairs and sports chu Govindas Konthoujam-a'n a enkawl dawn a, National People's Party hruaitu K Loken Singh chuan art and culture department leh tourism department a chang ang.

Minister-te chanpual tur hi Chief Minister leh Governor-te'n Delhi-a Prime Minister leh Union Home Minister bakah sorkar laipuia BJP hruaitute inbiakna an neihpui aṭanga kar khat hnuah tihchhuah a ni.

State sorkar chuan kumin March thla chawlh kar hnihnaa budget session neih zawhah, council of ministers tihzauh beisei a nih thu a tarlang Manipur-ah hian assembly member 60 awmin, CM telin minister 12 aia tam a neih theih loh a ni.