Meghalaya : Sorkar laipuiin Aadhaar leh scheme-a harsatna chingfel dawn

Union minister for social justice and empowerment, Virendra Kumar chuan Thawhṭanni khan Meghalaya-a Aadhaar siam kawngah leh, sorkar laipui sponsor scheme hrang hranga harsatna awmte chu state sorkar nen inremna siamin chinfel a ni dawn tih a sawi.

East Khasi Hills-a review meeting neih zawhah thuthar lakhawmtute kawmin, Union Minister chuan sorkar laipuiin ram pum huap scheme a siam thu leh, state tinah inang tlanga kalpui a ni dawn tih a sawi. Mahse a hmunhmain a zir loh emaw, inrelbawlna lama harsatna thleng emawte chu a bik takin Meghalaya-ah hun bituk neia chinfel tumin hmalak a ni, a ti.

State ṭhenkhatah harsatna tawk an awm a nih pawhin hamṭhatna hi mitinin an dawn theihna turin thawh hona ṭha tak siam a ni dawn tih a sawi. Meghalaya hmun ṭhenkhata Aadhaar siam chungchanga harsatna awm pawh ngaihtuah a nih thu a sawi bawk.

Review meeting-ah hian sorkar laipui sponsor scheme hrang hrang; Pradhan Mantri Awas Yojana, Pradhan Mantri Gram Sadak Yojana, Pradhan Mantri Krishi Sinchayee Yojana, and Mission Vatsalya bakah, School Education department leh social welfare hmalaknate sawi ho a ni.

Department hrang hrang aiawhte chuan Minister chu East Khasi Hills district-a scheme kalpui leh hmasawn dan an hrilh a ni. Kumar hian sikul, child care institution leh naupang facility hrang hrang a tlawh a, hamṭhatna dawngtute leh staff-te nen inbiakna neiin, harsatna an neihte an lo sawipui a ni.