Nagaland : NGTA-in nawrh huaihawt chhunzawm

Nagaland Government Teachers' Association (NGTA), SSA leh RMSA zirtirtu kum 2010 leh 2013 batch-te chuan an hlawh State Non-Development Expenditure-a telh an phutna tihhlawhtlin a la nih loh avangin nimin, Thawhṭanni aṭang khan state khawpui Kohima-a Naga Solidarity Park-ah nawrh huaihawt an chhunzawm.

Sorkar hnena ni sarih chhung an thil phut ngaihtuah tura hun an pek hnuah leh, ni hnih chhung buaina tel loa nawrh an huaihawt hnuah an thil phutte ngaihtuahsak an la nih loh avangin nawrh hi an chhunzawm a ni. Zirtirtute chuan Directorate of School Education kaltlangin State Non-Development Expenditure hnuaia an hlawh dah tel an phut a, tun thlenga telh an la ni lo chuan an service dinhmun leh sorkar zirtirtute himna a nghawng tih an sawi.

Kar liam ta Zirtawpni khan sorkar zirtirtu 2,293 chuan Kohima-a Directorate of School Education-ah lungawi lohna lantirin, sorkarin an thil phut a tihhlawhtlin sak loh avangin loh theih lohin nawrh hi huaihawt an ni tih an tarlang. An thil phut tihhlawhtlin a nih hma chuan lungawi lohna lantir chhunzawm zel an tum tih an sawi.

Chief secretary Sentiyanger Imchen kaihhruai, February 26-a high-level meeting neihah NGTA hlawh chungchang sawi ho a ni. Meeting-ah hian Naga Students' Federation (NSF) leh Eastern Nagaland Students' Federation (ENSF) aiawhte pawh telin, zirtuten lungawi lohna an lantir chuan zirna kawngah a ṭha lo lamin nghawng nasa tak a nei tih an tarlang.