Manipur : HPV vaccination drive hawng; ambulance 33 vailiam

Manipur chief minister Yumnam Khemchand Singh chuan February 28 Inrinnia ram pum huap chhul cancer dona atana Human Papillomavirus (HPV) Vaccination Campaign hawnna, Jawaharlal Nehru Institute of Medical Sciences (JNIMS), Imphal East-a Auditorium Hall-a neih a hmanpui. Programme hi ram chhunga state zawng zawngah virtual-in prime minister Narendra Modi chuan Ajmer, Rajasthan aṭangin a hawng a ni.

HPV vaccine hian hmeichhiate chu chhul cancer thlentu ber, HPV infection lakah a veng thei. Campaign-mode strategy hmangin hmeichhia kum 14-15 inkar hnenah a thlawnin vaccine hi pek a ni ang. Vaccine hi vawi khat lak tur a ni a, chhul cancer lakah a ven dawn bakah hmeichhe naupangte hmalam huna an hriselna atan a ṭangkai hle bawk.

Hawnna programme neih hma hian Chief Minister chuan district hrang hranga maternity service atana hman tur ambulance 33 a vailiam bawk. Ambulance-te hi North Eastern Council (NEC) fund hnuaia pek niin Directorate of Health Services kutah hlan a ni a, state puma nu nau pai leh nau neih enkawlna pek kawngah hman ṭangkai a ni ang. CM chuan JNIMS-a Registration Counter, Vaccination Room leh Observation Room-te a tlawh bawk a; doctor, nurse-te leh a chhawr ṭangkaitute nen inbiakna an neih bakah HPV vaccine la tawh hnenah vaccination certificate a hlan bawk.

CM Khemchand hian JNIMS campus chhunga kawng leh infrastructure dinhmun a enfiah bawk a ni. Programme-ah hian minister Khuraijam Loken Singh, chief secretary Puneet Kumar Goel, administrative secretary, health service director, doctor, nurse, medical staff-te leh midang eng emaw zat an tel.