Assam : Gauhati High Court-in CM lakah notice tichhuak

Gauhati High Court chuan Ningani khan state chief minister Himanta Biswa Sarma chu Muslim mipui huatna lam a sawi fo avangin notice a pe. Petitioner-te aiawh chief justice Ashutosh Kumar leh justice Arun Dev Choudhury-te awmna division bench chuan CM Sarma bakah sorkar laipui leh Assam sorkar lakah notice hi tichhuakin, hearing hi kumin April-ah neih a ni ang.

Petition thehluttu zingah hian Congress party, Assamese scholar Hiren Gohain leh Communist Party of India (Marxist) te an tel a, Supreme Court an thlen hnuah court chuan high court-a thlen turin a lo ti a ni. Advocate - Abhishek Manu Singhvi, Chander Uday Singh leh Meenakshi Arorate chuan CM Sarma hian Assam-a Miya Muslim-te vauna leh huatna bakah vote an thlak theihna tihtawp sak an ni dawn tih a sawi thu an tarlang.

CM Sarma-a'n kumin January 27-a thu a sawiah, Miya voter nuai chuang electoral roll aṭanga paih an nih tur thu leh, February 7-a BJP Assam Unit-in social media-a Sarma-a'n Muslim mi silaia a tinna video an thehdarhna, 'Point blank shot' tih leh 'No Mercy' tia an thehdarh thu te petition-ah hian tarlan a ni. Senior advocate Abhishek Manu Singhvi chuan Sarma hian Muslim-te huatna lam a sawi fo tih tarlangin, state hruaitu a nihna anga a tih loh tur a ni, a ti. Video chu paih bo leh ni mah se, mi maktaduai chuangin an en hman tih a sawi bawk.