Manipur : Sorkar laipuiin PMAY-G hnuaiah chenna in 5000 sak pawm

Union agriculture and rural development minister, Shivraj Singh Chouhan chuan Pradhan Mantri Awaas Yojana-Gramin (PMAY-G) hnuaiah Manipur-a hnam leh hnam inkara buaina chhuak avanga chenna in leh lo chhuahsan, internally displaced persons (IDPs) te chenna in 5000 sakna tur rawtna thlen a pawm.

Tun thla tir lam khan Manipur sorkar chuan IDP te tana in 5,000 sakna tur rawtna hi sorkar laipuiah a thlen a ni. State sorkar chuan IDP chhungkua 10,000 te inbenbelna tur chu kumin March 31 hmaa ngaihtuahsak a tum thu a lo sawi tawh bawk.

He thutlukna hi Thawhṭannia New Delhi-a Chouhan leh Manipur chief minister Yumnam Khemchand Singh bakah deputy chief minister Nemcha Kipgen leh Losii Dikho-ten high-level meeting an neihah siam a ni. Official thuchhuah chuan, chenna in 5000 chu rural housing scheme hnuaiah sak a ni dawn a, in chhung bungrua leh mamawh dah tel a ni dawn bawk tih a tarlang. He hmalakna hi chenna in leh lo chhuahsan mi sang tel inbengbelna tura ruahman a ni.

Meeting-ah hian CM Singh chuan Union Minister chu state dinhmun kimchang sawipuiin, insawnchhuahna kalpui dan leh chenna tur in mumal tak a rang lama an mamawh dante a hrilh a ni. Chouhan chuan tualchhung buaina chhuakin a nghawngte puibawm tur leh infrastructure thuam chak turin sorkar laipuiin ṭanpuina a pe chhunzawm zel dawn tih a sawi.

Union Rural Development ministry chuan Awass+ 2024 mobile App hman pawh a remti a, buainain a nghawng chhungkuate survey neiin, hamṭhatna dawng thei turin an tling tawk em tih an enfiah dawn a ni. State sorkar chu PMAY-G project hnuaia ṭanpuina dawng tur inziahluh kalpui chhunzawm phalsak a ni bawk.