Tripura : CM-in Tripura State Games hawng

Tripura chief minister Manik Saha chuan Pathianni khan Tripura Olympic Association buatsaih, Tripura State Games 2026 a hawng. He huna thu a sawiah, Saha chuan zirlaite chu zirna bakah infiamna lam uar turin a chah a, state sorkarin infiammite tan sports infrastructure tihhmasawn a ngaipawimawh tih a sawi bawk.

Hawnna inkhawmah hian sports minister Tinku Roy, Agartala Municipal Corporation mayor Dipak Majumdar, MLA Minarani Sarkar, gymnast Deepa Karmakar, sports secretary P K Chakraborty, West Tripura district magistrate Vishal Kumar, Assam Rifle leh BSF official-te an tel a ni.

CM Saha chuan state-ah sports facility tam tak din a ni tawh tih sawiin, infiamna lama ṭhalaite thiamna tipung turin hmalak chhunzawm zel a ni, a ti. Ram puma hmalaknate sawilangin, prime minister Narendra Modi chuan zirlaite leh ṭhalaite chu an zirna bakah, an taksa hriselna atan infiamna lam ngaipawimawh turin a chah tih a tarlang. Ram chhunga infiamna chawilarna atan inelna zingah Khelo India buatsaih ṭhin a nih thu a sawi bawk.

Chief Minister chuan State Games chu state-ah a vawikhatna atan buatsaih a nih thu sawiin, ṭhalai infiamna lama tui tak takte tan platform pawimawh tak a ni, a ti. He an hmalakna hmang hian inelna thianghlim chawikan beisei a ni a, a telte zingah thiamna tihhmasawn a nih theih a beisei thu a sawi bawk.