Manipur : CM leh Union Home Minister inbia

Manipur chief minister Yumnam Khemchand Singh chuan Pathianni khan union home minister Amit Shah chu New Delhi-a a chenna inah hmuin, inbiakna ṭha tak an nei. Singh hi Chief Minister atana February 4-a lakluh a nih hnua Union Home Minister nen meeting an neih vawi khatna a ni.

Chief Minister hi deputy chief minister Losii Dikho leh Nemcha Kipgen-ten an ṭawiawm. Meeting-ah hian state-a hnam leh hnam inkara buaina awmte chingfel tura state sorkar thar ruahmannate chu Amit Shah hian a thlirlet a ni. Sorkar thar din a nih hnuah remna leh muanna awm theihna turin hmalakna eng emaw zat kalpui a ni tawh. Shah chuan Manipur hruaitute chu sorkar laipui aṭangin thlawpna a pe chhunzawm zel dawn tih a lo hrilh a, Manipur hmasawnna turin an mamawh ang thil pawimawh apiang pek zel a tiam bawk.

Union Home Minister chuan Chief Minister chu state-a buaina chhuak avanga chenna in leh lo chhuahsan, internally displaced persons (IDPs)-te relief camp aṭanga sawn chhuah leh chenna tur pek chu ngaipawimawh ber turin a chah a, he hmalakna kalpui tur hian sorkar laipui aṭanga puihbawmna pek an ni dawn tih a hrilh bawk.