Arunachal Pradesh leh Assam inkarah border pillar dah

Arunachal Pradesh leh Assam inkarah a hmasa ber atan, Pakke-Kessang district-a Seijosa-ah Pathianni khan border pillar dah a ni. He hmalakna hi inter-state ramria buaina awm tihtawpna tura ruahman a ni.

State pahnih thuneitute chuan he pillar dah hi uluk taka enfiahin, he hunah hian Arunachal Pradesh-a Pakke Kessang district leh Assam-a Biswanath district-a Deputy Commissioner-te bakah police officer, khawtlang hruaitute leh khaw hotute an tel a ni. He hmalakna hi Namsai Declaration, July 2022-a ramria buaina awm chinfelna tura inremna an lo ziah tawh hmanga kalpui a ni.

Declaration an ziah aṭangin state pahniha minister leh official team-te chuan pillar dahna tur hmun hi tlawhin, document te enfiah a nih bakah tualchhung mipuite pawh biak rawn an ni bawk. Arunachal chief minister Pema Khandu chuan Seijosa pillar dah chu lawmawm a tih thu sawiin, ramria cheng mipuiten hun rei tak chhung an ram chin an hriat lohna a titawp dawn a ni, a ti.

Khandu chuan Seijosa pillar chu ramria buaina awm chinfelna a nih thu sawiin, state pahnih thawh dunna a tichak dawn a, ramria chengte inkarah inremna, hmasawnna leh inrintawkna a siam dawn tih a sawi bawk. Pakke Kessang district tana Regional Committee kaihruaitu, health minister Biyuram Wahge bakah, district official leh tualchhung aiawhte chu project tana an thawhhlawk avangin a fak bawk.