Assam : CM-in Guwahati airport terminal thar a hawng

Assam chief minister Himanta Biswa Sarma chuan Pathianni khan Guwahati-a Lokapriya Gopinath Bardoloi International Airport terminal thar chu hman ṭan theih turin a hawng. Terminal thar hi Pathianni tlai lam aṭang khan hman ṭan nghal niin, passenger maktaduai 13.1 dawl zo tura duan a ni.

Terminal thar hawnnaah hian Adani Airport Holdings Ltd (AAHL) director Jeet Adani a tel bawk. Passenger phur chhuak hmasa ber ceremonial boarding pass neih a ni a, Mumbai aṭangin Akasa Air thlawhtheihna chu he facility tharah hian a rawn ṭum bawk a ni.

Terminal thar hi hman ṭan a nih hmain check-in, bungrua enkawlna, security leh thlawhtheihna inherdante uluk taka enfiah hmasak phawt a ni bawk.

CM Sarma chuan kum kaltaa Advantage Assam 2.0 neiha Gautam Andani-a'n Rs vbc 50,000 investment a siam a tihpuitlin avangin lawmthu a sawi. Terminal thar chuan state tourism a thuam chak dawn tih a sawi.

Jeet Adani chuan terminal thar hawn a ni ta chu Assam leh hmarchhak bial mipuite tan hun lawmawm tak a nih thu sawiin, Prime Minister hmathlir future-ready infrastructure leh CM Sarma-a'n state economy tihhmasawnna tura a thil tum tihhlawhtlinna nen a inzawm vek a ni tih a tarlang. Guwahati hi ram chhunga non-metro airport ṭhang duang ber a ni a, airport-a passenger tam lamah ram chhungah top 10-ah a lang bawk. Airport hian ram chhunga hmun 21 a thlunzawm a, ram pawnah hmun thum - Bangkok, Paro leh Singapore-te a thlunzawm bakah, aircraft traffic movement (ATM) 130 chuang a enkawl bawk.