Manipur : BJP hruaitute hmu turin CM New Delhi-ah zin

Manipur chief minister Yumnam Khemchand Singh chu Inrinni khan New Delhi-ah zinin, central-a BJP hruaitute nen state cabinet tihzauhna tur an sawi ho dawn nia sawi a ni. Tun dinhmunah Chief Minister telin Manipur hian minister panga a nei mek a ni. Singh hian union home minister Amit Shah leh hruaitu dangte hemi chungchang sawipui tur hian a hmu dawn tih BJP thuchhuah chuan a tarlang.

Manipur-ah hian assembly member 60 awmin, CM telin minister 12 aia tam neih theih loh a ni. Sorkar laipuiin Presidents' rule a hlih hnuah kumin February 4 khan Singh hi Chief Minister atan lakluh niin, BJP MLA Nemcha Kipgen leh, Naga People’s Front legislator L Dikho-te chu deputy chief minister atan lakluh an ni. Govindas Konthoujam leh K Loken Singh-te pawh minister atana lakluh an ni bawk.

New Delhi-a meeting neihah hian CM hian state-a buaina chhuak avanga chenna in leh lo chhuahsante chungchang a sawi rin a ni. Tun hnaia IDP-te nen inbiakna an neihah Delhi a tlawh hunah an thil phut leh ngennate sawi ho a ni dawn tih a lo sawi tawh a ni.