Meghalaya : Lungalhthei metric ton 17,000 chuang man

Meghalaya police-te chuan East Jaintia Hills-ah lungalhthei metric ton 17,000 chuang leh lungalhthei khura puak thei thil hmanrua kg 25.5 an man. Police-te hian dan loa siam lungalhthei khur leh a thawn chhuahna chhuizuiin beihpui an thlak mek a ni.

He hmalakna hi Thangksu huamchhunga kumin February 5-a dan loa lungalhthei khur siam a puah avanga mi 34 an thihna leh, midang eng emaw zatin hliam an tuar hnua kalpui a ni. Dan loa lungalhthei khur siam titawp tur hian police-te chuan nasa takin hma an la mek a, East Jaintia Hills Police SP Pankaj Kumar Rasgania chuan district police-ten February 20-21 a beihpui an thlaknaah heng lungalhthei leh puak thei thilte hi lungalhthei khur rauhsan tawhah an hmuchhuak tih a sawi.

Rasgania chuan FIR 94 thehluh a ni tawh a, mi 22 man an ni tawh tih a sawi. Dan loa lungalhthei khur siam puah chhan chhui turin state sorkar chuan Special Investigation Team (SIT) a din bakah judicial inquiry commission a din bawk a ni. Meghalaya High Court pawhin hemi kaihhnawih hi a thlithlai bawk a, hearing neih laiin police official-te tel turin a hriattir bawk.

Official-te chuan East Jaintia Hills-ah hian khauh takin chhuizuina neih chhunzawm zel a ni dawn tih tarlangin, dan loa lungalhthei khur siamnaa inhnamhnawihte lakah hremna pek an ni dawn tih an sawi bawk a ni.