Nagaland : Sikul facility tichangtlung turin sorkar laipuiin hma a la: Union Minister Bambhaniya

Union minister Nimuben Jayantibhai Bambhaniya chuan February 21 khan Dimapur-a Kuda khuaa Nagaland Government Middle School tlawhin, sorkar laipuiin vantlang zirna tihchak kawngah nasa takin hma a la a, hmarchhak bialah hmasawnna hnathawh tihchak a ni dawn tih a sawi.

Zirlaite leh zirtirtute a kawmnaah, sorkar laipui chuan sikulte chu facility changkang zawkin a thuam chak dawn tih sawiin, tui in tur, inthiarna hmun leh classroom infrastructure a thuam ṭha dawn tih a sawi. Bambhaniya chuan sikul thuam ṭhat a nih chuan zirlaiten zirna kawngah hma an sawn phah dawn a, an hma hun zel atan a pawimawh tih a sawi.

National programme hrang hrang chu loneitu, hmeichhia, ṭhalai leh hnuaihnung zawkte chawikanna tur a nih thu sawiin, hmasawnna chu mitinin an chhawr ṭangkai dawn a ni, a ti. Mipuite chu tualchhunga thil siam chhuah ngaihlu turin a chah a, economy ṭhanlenna atan a ṭangkai tih a tarlang.

National Education Policy pawh sawilangin, Bambhaniya chuan hriatna tihzauh, thiamna tihhmasawn leh mahni ṭawng hmanga zirna pek chuan zirlaite inrintawkna a pe tih a sawi. Hei bakah ram chhunga zirna inte chu thuam chak an ni a, zirlaite facility pawh tihchangtlung belh zel a nih thu a tarlang.