Assam : Amit Shah-a'n Assam Police Battalion HQ lungphum phum

Union home minister Amit Shah chuan Inrinni khan Assam police 10th Battalion headquarters sakna tur lungphum a phum. He hunah hian governor Lakhsman Prasad Acharya leh chief minister Himanta Biswa Sarma bakah mi pawimawh eng emaw zat an tel.

Kalkhawmte hmaa thu a sawiah, Shah chuan headquarters thar chu bigha 124-a zau a ni dawn tih sawiin, chenna tur leh hnathawhna tur infrastructure, mipa tan barrack 750 leh hmeichhe tan 450 a awm dawn a, damdawi-in, training centre, fire range, surveillance facility leh sports complex a awm dawn tih a sawi. Headquarters sakna tur ram chu dan loa luah ṭhin a nih thu leh, state sorkarin project kalpui a nih theihnan a tifel tawh tih a sawi bawk.

Shah chuan state-a dan loa pemlut awm ṭhin chuan mipui awm zat leh venhimna kawngah buaina nasa tak a thlen tih a sawi. District tam tak chu dan loa pemlutten inbengbelna atan an hmang tawh a, state sorkarin ram bigha 1.45-a zaua dan loa chengte a sawn chhuak tawh tih a tarlang bawk. Sorkar chuan dan loa pemlut an ram lama thawn kir kawngah theihtawpin hma a la tih a sawi.

Hmasawnna kawnga hmalaknate tarlangin, Shah chuan state sorkarin sorkar hna nuai 1.4 chuang chu dik tak leh welfare programme hnuaiah a kalpui tih a tarlang. Hei bakah Rs vbc 27,000 senna semiconductor plant chu state-ah din a nih thu sawiin, zirna leh hnathawh tur ṭhalaite tan a siamsak a ni, a ti. Home Minister chuan prime minister Narendra Modi-a'n hmarchhak bial hmasawnna tur a ngaipawimawh tih sawiin, a tlawh fo thu a sawi bawk.