Nagaland : CM-in hmeichhe pual BPO centre a hawng

Nagaland chief minister Neiphiu Rio chuan state-a a hmasa ber atan hmeichhe pual bik business process outsourcing (BPO) centre chu Dimapur-ah Nilaini khan a hawng. He centre hi hmarchhak biala a hmasa ber niin, hmeichhiate tan technology lamah hmasawnna kawng hawnsakna tura duan a ni. Project hi Investment and Development Authority of Nagaland (IDAN) leh JSW (Jindal South West) Foundation thawh dunna hnuaia kalpui a ni.

BPO-ah hian hmeichhia 125 hnathawk tura lak phawt an ni dawn a, hemi hnuah thawktu 500 lak belh an la ni ang. IT-enabled service hmangin customer-te puihbawmna, data processing leh back-office operation kalpui a ni dawn a, hmeichhiate chu thiamna leh sum lak luh kawngah nasa takin a pui thei dawn a ni. BPO hi Maharashtra, Kerala leh Tamil Nadu-ahte kalpui a ni tawh bawk.

Hawnna inkhawma thu a sawiah, CM Rio chuan centre hawn chu technology ṭhanlenna kawnga state hmasawnna a nih thu a sawi. State ṭhalaite chuan thiamna tak tak nei turin theihna an nei tih tarlangin, Naga khawtlanga hmeichhiate pawimawhna a sawi bawk a, hnathawh tur remchang siamsak chuan economy mai bakah khawtlang tan hamṭhatna a thlen dawn a ni, a ti.

Sorkar chuan thiamna tihhmasawn, kutkawih eizawnna (entrepreneurship), leh private investment a ngaipawimawh tih CM chuan a tarlang. IDAN leh JSW Foundation thawh dunna hnuaiah hmeichhiate chawikan an ni dawn a, thiamna pek an nih dawn bakah hna mumal tak an nei dawn tih a sawi bawk.