Manipur : CM-in IDP sawnchhuah dan ennawn; DBT kaltlangin Rs vbc 33 pe chhuak

Manipur chief minister Yumnam Khemchand Singh chuan state-a hnam leh hnam inkara buaina a chhuah avanga chenna in leh lo chhuahsan, internally displaced person (IDP) te relief camp aṭanga sawn chhuah kalpui mek hmasawn dan leh, chenna tur hmun pek chungchang thlir letna chu Ningani khan Secretariat-ah kaihruaiin, he hunah hian official eng emaw zat an tel. Imphal West-a IDP-te tan Direct Benefit Transfer (DBT) kaltlangin Rs vbc 33 vel pek chhuah a ni tih CM chuan a sawi.

Meeting neih zawhah Chief Minister chuan Churachandpur leh Kangpokpi district aiawhte nen video conference neiin, Kuki-Zo MLA-te'n IDP-te sawn chhuah, pension, zirna, leh healthcare chungchanga lungawi lohna an thlente a ngaihthlaksak bawk. Video conference-ah hian Nghamun Relief Camp (Kangpokpi) IDP aiawh minister Nemcha Kipgen; Torbung Prefabricated (Churachandpur) aiawh MLA Letzamang Haokip; Sadhbhav Mandap, Khominthang (Churachandpur) aiawh MLA L.M. Khaute; MLA Paolienlal Haokip leh Sadhbhav Mandap, Tuibong (Churachandpur) aiawhte an tel a ni.

MLA L.M. Khaute chuan job card leh financial entitlement chungchanga a zawhna chu CM chuan chhangin, official process hmangin district hrang hrangah special job card transfer theih a nih thu a sawi a, case tihkhawtlaite chu MLA kaltlanga thehluh theih a nih thu a sawi bawk.