Assam : Amit Shah-a'n VPP thawh hnihna tlangzarh

Union home minister Amit Shah chuan nimin khan Cachar, Assam-a Nathanpur-ah Vibrant Villages Programme (VPP) thawh hnihna a tlangzarh. VVP-II hi central fund scheme niin, financial year 2028-29 atan Rs vbc 6,839 ruahman a ni a, state 15 leh Union territory pahniha khaw 1,954 ah kalpui a ni ang.

VPP-II hmang hian infrastructure pawimawh tihchangtlung, service hmuh theihna tihpun leh eizawnna kawng hrang hrang siamte chu a tum ber niin, ramri khuaa cheng mipuite thuam chakna tura ruahman a ni. He programme hi Viksit Bharat 2047 hmathlir zulzuia kalpui a ni.

VVP programme hi sorkar laipui chuan kum 2023 February 15 khan a siam a; Arunachal Pradesh, Himachal Pradesh, Sikkim, Uttarakhand leh Lada state-a district 19, hmarchhak lam ramri bulhnai block 46-a khaw thlan bik 662-ah kalpui a ni. VVP-I hnuaiah Ministry of Home Affairs chuan Rs vbc 3,431 senna project 2,558 a sanction tawh a, activity 8,500 chuang awmin awareness drive, health and veterinary camp, fair leh festival leh tour promotion-te pawh a tel.

Kum kalta April 2 khan sorkar laipui chuan a thawh hnihna kalpui a remtih thu minister of state for home affairs Nityanand Rai chuan February 3 khan Lok Sabha-ah a sawi a ni. Ramria khua eng emaw zat thuam chak a nih rualin, programme hmang hian mipuite chu ram leh hnam venhim kawnga hma la leh tha thawh tura hriattir an ni bawk.