Tripura : Brick siamna industry-ten harsatna tawk

Tripura-a brick siamna hmun industry 300 vel chu state-ah lungalhthei supply tihtawp a nih avangin ni 10 chhungin khar a ni dawn tih Tripura Brick Manufacturers Association chuan a tarlang. State-a brick siamna 280 vel chu la kalpui mekin, a dang zawng chu chhan hrang hrang vamgin khar an ni tawh.

Association chuan brick siamna neituten lungalhthei an neih sa chuan ni 10 bak a daih dawn lo tih sawiin, brick siam pawh tawpsan a ngai dawn a ni, an ti. Association president Bivekananda Choudhury chuan brick siamna neitute nen meeting an nei tawh tih sawiin, industry-a an hman ber lungalhthei chu ni 15 vel state-ah supply a nih tawh loh avangin harsatna nasa tak an tawk tih a sawi.

Meghalaya leh hmun dang aṭanga lungalhthei supply tihtawp a nih avangin leh, rel hmang pawha thawn a nih loh avangin brick siam tawpsan a ngai dawn tih Choudhury chuan a sawi bawk. Unit ṭhenkhat chuan brick an siam theih tawh loh thu sawiin, lungalhthei la neite chuan an siam theih chin siam an tum tih a tarlang. State sorkar chu an dinhmun khirh zual zel tihtawpna atan rel hmanga lungalhthei supply tir turin a ngen nghal bawk.

Brick siamna hmanrua an tlakchham bakah, brick siam thiam hnathawktu pawh an indaih loh thu a sawi. Choudhury chuan kum eng emaw zat liam ta chhungin brick hralh a tlakhniam thu sawiin, lungalhthei man sang chuan hlawkna nasa takin a tihniam a, hei hian brick siamna neitute harsatna a thlen tih a sawi a ni.