Nagaland: China-a cyber hmanga mi bum ṭhin puih avangin hmeichhe pakhat man

Gurugram police leh Indian Cyber Crime Coordination Centre (I4C), Ministry of Home Affairs ṭangkawp chuan China-a cyber hmanga mi bum ṭhin a puih avangin Naga hmeichhe pakhat an man. An mi man hi Kung Panmae (30), Dimapur, Nagaland mi niin Sector 28, Gurugram-ah in a luah a ni. A kut aṭangin mobile phone pasarih, WiFi modem pakhat, SIM card pathum leh laptop chhe tawh an man.

Police officer pakhat chuan an mi man leh a pasal chu Chinese-origin cybercriminal-te nen an thawk ho tih hriat chhuah a nih thu a sawi a, Gurugram-a an in luahah virtual SIM box hmangin cyber hmanga inbumnaah hian China mite chu an pui ṭhin tih a sawi. Police-te hian February 10-a cyber police station-a team hnenah mi pakhat leh a nupuiin Sector 28-a an in luahah virtual SIM box an dah tih thu an dawn hnuah hma an la nghal a ni.

Chhuizuina an neihah mobile pathum chu India-a number hrang hrang automatic-in an call tih hmuhchhuah a ni. Mobile screen-ah hian "VDMS Apk App" tih a inziak bawk. Police-ten thu zawhfiahnaah, an mi man hmeichhia chuan a hna chu mobile phone charge leh network connect reng a nih thu a sawi. Virtual SIM box hmang hian China-a cyber hmanga mi bum ṭhinte chuan India mipuite hnenah digital hmanga inbumna; gaming, investment, leh thil dang hmanga bum turin call an siam ṭhin. He an hnathawh hmang hian a pasal chuan commission a dawng tih ACP Dewan chuan a sawi.